Job 31

1 ^a“Niĩ nĩtwarĩĩkanĩire na maitho makwa
ndikanarore mũirĩtu ndĩmwĩrirĩrie.
2Nĩ ũndũ-rĩ, kaĩ rũgai rwa mũndũ kuuma igũrũ kwa Ngai rũkĩrĩ kĩĩ?
Igai rĩake nĩ rĩrĩkũ kuuma kũrĩ ũcio Mwene-Hinya-Wothe ũrĩ igũrũ?
3 ^bGithĩ ti kwanangwo kwa arĩa aaganu,
na mũtino kũrĩ arĩa meekaga maũndũ mooru?
4 ^cGithĩ we ndonaga njĩra ciakwa,
na agatara o ikinya o ikinya rĩakwa?

5“Ingĩkorwo thiiaga na njĩra itarĩ cia ma-rĩ,
kana kũgũrũ gwakwa gũkahiũha thiĩ ngaheenanie-rĩ,
6 ^dNgai nĩathime na ratiri cia kĩhooto,
nake nĩekũmenya atĩ niĩ ndirĩ ũcuuke;
7 ^emakinya makwa mangĩkorwo nĩmahũkĩte makoima njĩra-inĩ,
nayo ngoro yakwa ĩngĩkorwo nĩĩtongoretio nĩ maitho makwa,
kana moko makwa makorwo nĩmathaahĩtio-rĩ,
8hĩndĩ ĩyo kĩrĩa haandĩte kĩrorĩĩo nĩ andũ angĩ,
nacio irio cia mĩgũnda yakwa iromunywo.

9 ^f“Ngoro yakwa ĩngĩkorwo yanaheenererio nĩ mũndũ-wa-nja,
kana ngorwo ndanaceema mũrango-inĩ wa mũndũ wa itũũra,
10 ^ghĩndĩ ĩyo mũtumia wakwa arothĩa ngano ya mũndũ ũngĩ,
na arũme angĩ tiga niĩ marokoma nake.
11 ^hNĩgũkorwo ũndũ ũcio nĩ ũmaramari wa thoni,
na nĩ rĩĩhia rĩa gũtuĩrwo ciira nĩ kĩama.
12Tondũ ũcio nĩ mwaki ũrĩa ũcinaga nginya ũkaananga;
na nĩũngĩamunyĩte magetha makwa mothe.

13 ⁱ“Ingĩkorwo nĩnyimĩte ndungata ciakwa cia arũme na cia andũ-a-nja kĩhooto
rĩrĩa manateta nĩ ũndũ wakwa-rĩ,
14 ^jniĩ ngeeka atĩa rĩrĩa Mũrungu akaanjũkĩrĩra?
Ngaacookia atĩa rĩrĩa ngeetwo ndĩĩtetere ũhoro-inĩ ũcio?
15Githĩ ũcio wanyũũmbire kũu nda ya maitũ to we wamoombire?
Githĩ tiwe watũthondekire tũrĩ kũu nda cia aa maitũ?

16 ^k“Ingĩkorwo ndanaima athĩĩni kĩrĩa maanerirĩria,
kana ngareka maitho ma mũtũmia wa ndigwa morwo nĩ hinya-rĩ,
17ingĩkorwo ndĩĩaga irio ciakwa nyiki,
ngaaga kũgayana na ũrĩa ũtarĩ ithe-rĩ,
18(no niĩ kuuma ũnini wakwa, mwana ta ũcio ndaamũreraga o ta ũrĩa angĩarerirwo nĩ ithe,
na kuuma gũciarwo gwakwa ndũire ndongoragia mũtumia wa ndigwa)
19ingĩkorwo ndanoona mũndũ agĩkua nĩ ũndũ wa kwaga nguo,
kana ngoona mũndũ mũbatari atarĩ kĩndũ gĩa kwĩhumba,
20 ^lna ngoro yake ndĩandathimire nĩ ũndũ wa kũmũiguithia ũrugarĩ
na guoya wa ngʼondu ciakwa-rĩ,
21ingĩkorwo ndanoya guoko gwakwa ngookĩrĩra mwana ũtarĩ ithe,
nĩkũmenya atĩ no nyone wa kũndeithia kwagĩa ciira igooti-inĩ-rĩ,
22 ^mhĩndĩ ĩyo guoko gwakwa kũroahũkĩra kĩande-inĩ kũgwe,
kũroinĩkĩra o irũngo-inĩ.
23Nĩ ũndũ nĩndetigagĩra mwanangĩko uumĩte kũrĩ Mũrungu,
na nĩ ũndũ wa gwĩtigĩra riiri wake, ndingĩekire maũndũ ta macio.

24“Ingĩkorwo nĩnjigĩte mwĩhoko wakwa harĩ thahabu,
kana ngeera thahabu ĩrĩa therie mũno atĩrĩ, ‘Wee nĩwe ũgitĩri wakwa,’
25 ⁿingĩkorwo ndanakenera ũtonga wakwa mũnene,
kana ngakenera uumithio ũrĩa moko makwa mecarĩirie-rĩ,
26ingĩkorwo ndanarũmbũiya riũa rĩarĩte,
kana mweri ũgĩthiĩ ũcangararĩte,
27 ^ona ngoro yakwa ĩkĩheenererio nĩcio na hitho,
kana guoko gwakwa gũgĩcikinyĩria kĩmumunyano gĩa gũcitĩĩa-rĩ,
28 ^po na macio mangĩtuĩka mehia ma gũtuĩrwo ciira,
nĩgũkorwo ingĩtuĩkĩte mũndũ ũtarĩ mwĩhokeku harĩ Mũrungu ũrĩa ũrĩ igũrũ.

29 ^q“Ingĩkorwo ndaanakena nĩ thũ yakwa kuona mũtino,
kana ngĩmĩthekerera rĩrĩa thĩĩna wamĩkora,
30no niĩ ndirĩ ndetĩkĩra kanua gakwa keehie
na ũndũ wa kũhoera muoyo wayo kĩrumi,
31 ^rkũngĩkorwo andũ a nyũmba yakwa matirĩ moiga atĩrĩ,
‘Nũũ ũtarĩ warĩa nyama cia Ayubu akahũũna?’
32 ^sno gũtirĩ mũgeni wanaraara njĩra-inĩ,
nĩ ũndũ mũrango wa mũciĩ wakwa ũtũire ũhingũrĩirwo mũgendi,
33ingĩkorwo ndaanahitha mehia makwa, ta ũrĩa andũ meekaga,
na ũndũ wa kũhitha mahĩtia ngoro-inĩ yakwa
34 ^ttondũ wa gwĩtigĩra kĩrĩndĩ,
o na gwĩtigĩra kũmenwo nĩ mĩhĩrĩga
ngagĩkira ki na ndiume nja-rĩ,

35(“Naarĩ korwo ndaarĩ na mũndũ wa kũnjigua!
Rĩu nĩndekĩra rũũri rwa kwĩyarĩrĩria:
reke Mwene-Hinya-Wothe anjookerie ũhoro;
reke mũũthitangi andĩke marũa ma thitango yake.
36 ^uTi-itherũ marũa macio ingĩmaigĩrĩra kĩande,
ndĩmehumbe taarĩ thũmbĩ.
37Njooke ndĩmũhe ũhoro wakwa ikinya gwa ikinya;
ndĩmũkuhĩrĩrie ta ndĩ mũnene.)

38 ^v“Korwo mũgũnda wakwa wakaya, ũnjũkĩrĩre,
nayo mĩtaro yaguo yothe ĩkorwo ĩkĩrĩra maithori,
39 ^wingĩkorwo ndanarĩa maciaro maguo iteekũrĩha,
kana ngoraga ngoro cia ene guo-rĩ,
40 ^xhĩndĩ ĩyo congʼe ũrokũra kuo handũ ha ngano,
na riya handũ ha cairi.”
Ndeto cia Ayubu nĩciathira.